سمك البطاطا

 سمكة البطاطا

سمكة البطاطا :
سمك البطاطا من أكثر الاسماك انتشارا فى الاسكندريه و برغم ضعف القشره الخارجيه له إلا أن له شوك ضهر قوي و مفتري إوعى ف يوم تجربه فإذا ما طالت أصابعك فستتألم بشكل فظيع واسألونى أنا عشان عرفت دا بالطريقه الصعبه لكنى حتى الأن أفضله كثيرا.... وهو سمك صاحب طعم مختلف لا يحبه الكثيرين
سمكة البطاطا هو سمك عشبي يأكل الأعشاب البحريه و الطحالب لذلك تجده فى الوعر وبين الصخور و يشبه فى ذلك سمك الشراغيش 

مواسم صيد سمك البطاطا :
موسم صيد سمك البطاطا على ما اتذكر كان بيبدأ أول يوليو وحتى اخر شهر أغسطس بس من فتره صارت موجوده طول السنة بس طبعا بعد التوسعات العبقريه والاعمال الحفريه و الترميم حدث تلاعب فى مستعمراتها وبدأت أعدادها فى الإنخفاض فى أغلب الأماكن .
لكن يمكنك صيدها حاليا من بعض الأماكن و الموانىء القديمة التى لم تمس حتى الان كميناء ابوقير والدخيلة والمكس وايضا جزيرة نيلسون .

موسم التفريخ بيكون في بداية ابريل وهي سمكة نهارية يعني مش موجوده بالليل واقصد انك تقدر تنزل عليها من مطلع الشمس الصبح حوالى 7 ص لحد قبل المغرب بساعه.

سمك بطاطا

طرق صيد سمك البطاطا :

سمكة البطاطا لا يمكن صيدها بالماكينه مع ان فيه ناس خدتها بالماكينه بس صدفه نادره جدا وأفضل طرق صيد سمك البطاطا هى بالبوصه اليد
البطاطا سمكه جلدها طري لكنها سمكه قويه جدا لكن موش بتحتاج وقت فى تعلم صيدها إذا قدرت تطلع 3 أو 4 سمكات ف خلاص انت كده عرفت طريقه غمزة السمكه و بتتعامل معاها إزاى ... بس عموما لازم تعرف انك لما تطلع بالسمكه من الميه تمسكها من خيشومها من الناحيه اللى مفيهاش شووك
فى سمك البطاطا بتظبط العيار على تلتين ارتفاع الميه يعنى لو العمق مثلا 3 متر يبقي العيار 2 متر ودا تقدر تظبطه مع اول كام رميه ، حد هيسألنى طب هى بتغمز إزاى ؟؟؟؟   بص يا ريس عندك حاجه من 2 

أولا هتصطاد حساس يعنى من غير فله

يعنى بسبحه من 5 الى 8 سلاح وبنحط رصاصه نمره واحد فى أخر الشعر من تحت وطول السلاح من 8 الى 12 سم تقريبا وعموما دا بيكون تقديري يعنى موش بنقيسها بمسطره و بنستخدم الشعر الاساسي 25 أو 30 و الفروع 20 أو ممكن تستعمل فى الكل شعر 25 والسلاح ممكني يكون نمره 6 او 7  لكن الطريقه دى متعبه عشان بتحمل البوصه على إيدك عشان تحس بشدة السمكه فترد عليها بنتشه قويه وبسبب كده أغلب الصيادين موش بيفضلوها عشان مرهقه

ثانيا تصطاد بفله
وانا اعتقد انها الافضل لأن سمكة البطاطا قويه ف متتعبكش السمكه غير وانت بتطلعها
طبعا الشعر الاساسي 25 والفروع 20 أو 18 بس متزودش عن كده  يفضل للمبتدئين 20 و بالنسبه للسلاح فيه حاجتين ممكن تستخدم السنار العادى نمره 20او 22 او 24 " سن الدبانه " ممكن تستعمل الشلاط بس تعمل القرمه صغيره (متزيدش عن 20 سم ) وانا شايف ان افضل مقاس للشلاط يكون 18 فرنساوي  ..... حجم الفله حسب عينك بس المهم تظبط وزنها مع الثقل (الرصاص ) وستلاحظ عند صيد البطاطا ستجد الفله تنجذب للأسفل عدة مرات سريعه لذا عليك الانتظار حتى تغمر الفله فى القاع ثم إنتش و على بركة الله و ردك على السمكه على العاصي  و فى اتجاه واحد على فوق واوعى تنتش تانى عشان لو عملت كده هتفلت منك السمكه وهتقع من السلاح
وبفكرك تانى فى سمك البطاطا بتظبط العيار على تلتين ارتفاع الميه يعنى لو العمق مثلا 3 متر يبقي العيار 2 متر ودا تقدر تظبطه مع اول كام رميه

الطعم المفضل في سمك البطاطا :
اولا : العجين سواء عجينة دقيق او عيش أهم حاجه تكون عجينة ناشفة موش سايحه يعنى تكون ماسكه نفسها مع انها غير مفضله فى الاستخدام مع السلاح الحر سواء سنار او شلاط  ( طرق صنع عجينة الصيد )
ثانيا : الجمبري( البرغوت ) مع سمكة البطاطا تقدر تزفر بعيش ( يعنى تبله لحد ما يفرول وتبتدي ترميه فى الميه على شكل كور بس تاخد بالك من إتجاه الريح و الميه ماشيه إزاى ) وتطعم بالبرغوت
ثالثا : الخضرة الشعر ( النسيله ) لازم الخضره تكون موجوده فى الميه لو نويت تصطاد بيها ومواعيدها بتكون من بدايات شهر 9 لحد أول او منتصف شهر 11 حسب درجة حرارة الميه عشان الميه لما بتسقع قوي بتحرق الخضره ف بتختفي واشهر وامهر ناس مشهورين بالصيد بالخضره هما أهل بحري وبالذات الصيد على الطابليته ..... وكمان من كام سنه كانت الخضره هى رقم واحد فى صيد سمك البطاطا
طبخ سمك البطاطا :
سمك بطاطا أحلى طرقه هو الشوي على الجريل ويمكن عمله مقلى مقفول أو مشوي بالزيت و الليمون او صينيه بس الاهم قبل كل دا غسل السمك جيدا ولا انسي أن أذكرك ان هناك عدد من النصائح يمكنك معرفتها   ( نصائح مهمه للصيد بالبوصه )

                        وإن شاء الله ربنا هيكرمك بوحوش .... بالتوفيق ان شاء الله
                            متنساش تعزم       وبالهنا و الشفا

طبعا لو غاوي صيد زيي لازم تزور صفحة تعلم صيد السمك واذا بتتعب من صيد التسقيط يبقي اكيد محتاج تعرف علاج دوار البحر

اتمنى للجميع الافادة وعشان تستفيد اكتر ادخل على 

https://al-sayad.blogspot.com

تابع معنا أيضا للمزيد من الخبره و المعلومات 

صيد سمك الدراك 

حساب مواعيد المد و الجزر

 

صيد سمك البوري

 

افضل اوقات صيد السمك

 

اشهر أماكن ادوات الصيد بالاسكندريه