أفضل أماكن القاروص واللوت في الاسكندريه

افضل اماكن القاروص والنقط واللوت فى الاسكندريه هى :

الطرح ، المعدية ، بتروجيت ، إدكو

كل الاماكن دي مشهورة بأسماك القاروص والنقط واللوت بسبب قربها من مصبات المياه العذبة وطبعا من المعروف ان الاسماك دي بتفضل المياة الأقل ملوحة

خلونا بقي نفصل عن الاماكن بالتفصيل من حيث انواع الطعوم المستخدمه وطريقة التطعيم وأماكن بيع الطعم وكمان السمك المتواجد وطريقة صيده.

اوصل هناك إزاى ؟؟؟

شوف الموضوع بسيط .. من اى مكان في اسكندريه هتوصل ميدان المندرة ومن هناك هتركب ميكروباص الطابية وف بعض الاحيان القليله مبيكونش موجود ، ف لو ملاقيتش هتركب بروضع ميكروباص بس المره دى هتركب ابوقير وتطلب منه ينزلك عند انزل مزلقان المعمورة البلد هتلاقي عنده ميكروباص كتير اوي ف اركب الطابية من هناك ومنها لميكروباص تانى تركب للمعدية.

اما بقي بالعربيه هتكون اسهل خالص لأنك هتاخد نفس طريق الميكروباص لكن طبعا بدون التعب الخاص بتغيير المواصلات اكتر من مره.

أولا :أحواض الطرح أو أحواض الكهرباء

جمالها انها بدون تصريح والسمك بيدخل الاحواض في الشتاء يدور على المياة السخنة اللي حوالين أحواض التبريد والصيد من داخل الاحواض او على البحر المفتوح.

ثانيا : لسان المعدية

بدون تصريح والصيد على الشمال في التلت الاخير وعلى راس اللسان.

ثالثا : ميناء بتروجيت

للعاملين بالشركة او بواسطة او وزي باقي المواني بتصريح والصيد جوه بيكون على الارصفة او على الحجارة او في الضهر وكمان ممكن ترمي ناحية المياة السخنة اللي طالعة من أحواض الكهرباء.

رابعا : ميناء إدكو

بتصريح من الأمن البحري ولازم ظابط واسطة في البحرية يضمنك.

هنصطاد بأيه؟

الطعوم وطريقة تطعيمها:

1- طبعا رقم واحد الشطنارة الصاحية ودي لازم جردل وموتور عشان تعيشها ويفضل تجيبها من المعدية او الطابية لانها بتكون جاية من إدكو، طعم جاي من نفس المياة يعني السمكة عارفاه وماسكاه ده غير انه بيكون متعود على المياة نفسها فبيعيش معاك أكتر.

طريقة تطعيمها :  بتشكها من الراس أو الديل ، انا عن نفسي بفضل شكة الراس في الجزء الفاضي قبل المخ بشوية ودي أحسن شكة وأصعب شكة لأنك لو غلطت والسلاح شكها في مخها هتموت في ساعتها، غير كده الشك من الراس بيخلي الجمبراية بصحتها وتنزل واقفة على الأرض ودماغها لفوق زي ما بتقف في الطبيعة على الحروف او عايمة زي ما بتتحرك في الطبيعة برضه فالسمكة متحسش بالكمين غير لو شكيتها من ديلها والجمبراية نزلت مدلدلة لتحت، كمان الشك من الديل مش بيخلي الجمبراية تعيش كتير لكن ممكن تشكها من ديلها لو لاقيت السمكة صغيرة.

2- الدود المشرشر: بتشك دودتين او تلاتة من دماغهم لحد ما تملى السلاح وتسيب جسمهم مدلدل، لان الدماغ أقوى جزء في جسم الدود المشرشر ده غير انه بيقطع الجزء المصاب منه ويهرب بيه من  السلاح فلو شكيته من نصه بتلاقيه بيقسم نفسه اجزاء وبيقع من على السلاح.

3- دود البحر والدود القراص: بتدكك نص الدودة وتسيب النص التاني مدلدل عشان يخايل السمكة.

4- الدود ابو جراب: بتفتح جراب الدودة بتكون عايشه جواه وتبتدي تزقها من الجزء المقفول هتطلع معاك بتدكك نصها في السلاح وتسيب نصها بره، صيادة أوي وغالية أوي ومش دايما بنلاقيها.

5- السردين: بتجيب السردين طازة وتملحه قبل ما تنزل بساعة وتقطعه مكعبات على المياة عشان لمعته تفضل فيه وتخايل السمكة وتدكك السلاح فيه مرتين.

6- البرغوت: شك من 3 ل 5 جمبريات من ديلهم في السلاح وأدعيلي :)

7-الحناش: التعبان الاخضر الصغير

 لو المية اللى قاعد عليها سخنة بتشكه من قبل الديل بشوية وتقص ديله وترميه بنصطاد بيه فقط بالماكينة و على الارض بسلاح واحد طويل تحت الرصاصة وأقل شعر تستخدمه في الحاله دي 25 ولو المياة ساقعة بترميه على العايم بشمندورة وسلاح واحد تحت الرصاصة.

حد يقولى طب احنا بنقص الديل لي يا عم الحج ؟

قص الديل بيكون عشان ميحفرش في الرملة ويدفن نفسه وساعات السمكة بتدور على الحنش المصاب لو مكالتش عليه أرميه سليم عايم بالشمندورة هينزل بصحته ويقعد يلف حوالين نفسه ويجيبلك السمكة من اخر الدنيا.

أماكن بيع الطعوم:

1- الحاج رمضان في المعمورة: قراص + عدة 

2- شرشر في المعدية: شطنارة + حناش

3-حسين بركات في الطابية: شطنارة + حناش + مشرشر

السمك الموجود وطريقة صيده:

اولا :  القاروص

سمك عايم في الشتاء وسمك وعر في الصيف بياكل على العايم وعلى الارض حسب درجة حرارة المياة بتلاقيه عايم لو المياة ساقعة وعلى الارض لو المياة سخنة ، بيحب الشطنارة والمشرشر والقراص ودود البحر والدود ابو جراب بتشتغل عليه دايما بجواز واسعة.

الماكينة: جوز تحت الرصاصة ورصاصة على الارض او نفس الجوز وشمندورة على العايم.

البوصة: فلة وجوز واسع وهتلاقي الفلة بتغطس وبتجري لجوه ، والحساس جوز تحت الرصاصة وتعمل الشعر قد المياة بالظبط بحيث تنزل ويبقى لبلوب البوصة على وش المياة وترفع شبر عن الارض فانت لو شاكك الجمبراية من راسها بتنزل واقفة وبيدخل يشفطها ويشد إيدك والطريقة دي إسمها البالون.

سمكة زكية وعايزة شعراية رفيعة وتخلي معاك ملقاف، بيدخل كمان على المعالق الصغيرة والجرينجو والرابلات الريد هيد بس كل مكان وله شغله، ولازم الملقاف يبقى جنبك عشان غلطتها حلوة والسمكة اللي هتروح هتزعل عليها.

ثانيا : سمك اللوت

بتلاقيه دايما بيجري ورا النقط الرفيع وجران البوري بس بتعشق الحناش وبتستفزها وكمان بتدخل على الشطنارة الصاحية بتطعملها الحنش على الارض وديله مقصوص لو المياة سخنة ولما المياة تسقع يبقى على العايم بشمندورة وسلاح واحد مع الحنش او جوز واسع وجمبري شطنارة وتسيبها تمسك الطعم وتاكله براحتها وتكون فاتح الزنان عشان تديها شعر اول ما تصرخ ، سمكة سريعة وقوية جدا خصوصا في الأول بعد كده واحدة واحدة معاها هتموتها وتخلي معاك ملقاف.

ثالثا : سمك النقط

سمكة شبه القاروص بالظبط في الطعم والشكل بس ضهرها منقط، بتاكل شطنارة ومشرشر ودود بحر وقراص وسردين وبرغوت شغلها زي القاروص بالظبط وممكن كمان تعملها سبحة عشان تخايلها وتهجم عليك، أهم حاجة تطعم صح عشان تاخد النقطاية (الشويحي) الكبيرة .