صيد سمك اللوت

صيد سمك ( اللوت )

اللوت هو أحد أنواع القاروص ويممكن تربيتها في مزارع في المياه العذبة وهي سمكة لذيذة وسعرها متوسط في يد الجميع ولكنها يعيبها بحكم البيئة الطينية التي تعيش فيها ان احشائها مليئة بالطين لذلك يجب تنظيفها جيدا قبل الأكل وهي نوعين اللوت والشفش
 اللوت يميل للمياه العذبة اما الشفش يعيش في مياه الصافية ذات الرمال البيضاء مثل الساحل الشمالي.

صيد سمك اللوت

مكان التواجد بالاسكندريه

داخل المينا  وعلى ألسنة الشواطىء وطريق الساحل حتى مارينا وما بعدها وفى الأصل فإن سمك اللوت  تنتشر فى البحر المتوسط والدول المطله عليه عامة كذلك فى البحر الأسود وغرب افريقيا و قد توجد فى شمال البحر الأحمر 

موسم اللوت 

يتواجد اللوت فى البحر المتوسط من نهاية شهر 10 الى بداية الربيع تقريبا فأسماك اللوت تنمو بشكل جيد فى الصيف ولكن مع دخول الشتاء وانخفاض درجة الحرارة يقل نشاطها جدا حتى تصل درجة الحرارة الى 13-15 درجة مئوية.

وأثناء شهر أبريل تتجه الامهات من عرض البحر الى الشواطئ لتتغذى جيدا حيث يكثر الغذاء وذلك للتجهيز لموسم التبويض لديها

الطعم المفضل لسمك اللوت

تتغذى اسماك اللوت على الأسماك الصغيرة والقشريات الموجودة فى البيئة المحيطة لكن أفضل طعم لها هو زريعة تعبان المياه العذبة ودى بتيجي من المعدية بالكيلو بتبقى ارخص بكتير عن انك تشترى بالواحد الكيلو بيتراوح سعره من 25ج إلى 35ج
ولو اشتريت بالتعبان الواحد التعبان بيبقى فى حدود 2 جنيه تقريبا
اهم حاجة فى التعابين انها تكون صاحية وتحافظ عليها صاحية بانك تحطها فى جردل به مياه وما تحطش اكتر من 10 تعابين مع بعض فى الجردل وتحط نصه مياه عذبة على مياه مالحة واللى يفضل منك بعد الصيد ابقى غيرله المياه كل يوم حيقعد معاك فترة طويلة تصل الى خمسة ايام

سمك اللوت

العدة المطلوبة لصيد اللوت 

1- عدد 2 بوصة بمكنهم الشعر على الماكينات 45 او 50
2- بكرة واير 20 او 25
3- سنار 03او 02
4- شعر ترميل 40
5- مدور كبير
6- خيط براشوت
7- عدد 2 فلة كبيرة تقدرتعوم وهى تحتها رصاصة رقم واحد
تجهيز العدة للصيد
1- حتربط كل سنارة بقطعة من الواير فى حدود 30 سم بس لازم يكون معاك بنز وقصافة لربط السنار وقطع الواير وبالنسبة للناس اللى مش حتعرف تربطهم فى وايرات جاهزة بالسنارة بتتباع مفهاش اى مشكلة يتربط فيهم شعر الترميل مباشرة
2- بنربط متر شعر40 فى الواير من الاتجاه الأخر من السنار ..... كدة انت جهزت السنارة بشعر الترميل
3- نوسع خرم الفله  بمفك أو بمسمار بحيث انها تقدر تتحرك بسلاسة داخل شعر الماكينة
4- حتفرد البوصة بتاعة الماكينة وتعدى الشعر من الدبل عادى خالص
5-  بعد ماعديت الشعر من الدبل دخل الفلة اللى وسعتها
6- حط الرصاصة رقم واحد
7- اربط المدور بعدها كدة بقت البوصة جاهزة بس الفلة كدة بتتحرك طالعة نازلة صح ؟
حنعمل ايه ؟
8- حنقيس حوالى 3 متر من المدور بعدهم حنجيب قطعة من من خيط البراشوت ونبدأ تلفها على الشعر مع الشد جامد على الشعر بحيث ان سمك اللف دة ما يسمحش للفلة انها تعدى بيبقى زى محبس للفلة
وفى نفس الوقت مش حيعاكسك وانت بتشوح وولا حيعاكسك وانت بتلم دى اسمها الفلة المجنونة
ملحوظه : لو حتصطاد بالليل ممكن تخرم خرم اضافى فى الفلة بجوار الخرم الرئيسى وتحط فيه فسفورة عادى اربط شعر الترميل بالستارة والواير اللى انت جهزتهم
9- طعم حنش من ديله ححتلاقيه ناشف معاك ما تخافش اغرسه جوة السنارة وطلعه مرة واحدة
10 شوح جوة ولم البوش

طعم حنش من ديله ححتلاقيه ناشف معاك ما تخافش اغرسه جوة السنارة وطلعه مرة واحدة

صيد سمك اللوت

حتجهز البوصة التانية بالماكينة وحتعمل معاها نفس الكلام بس العقدة بتاعة الفلة هنا حنزود ها يعنى حتقيس حوالة 5 متر من المدور وبعدها تعمل العقدة
ملحوظة / عمق المياه اللى حتصطاد فيها هنا لا تقل عن 7 متر
اما بالنسبة للصيد من مارينا تحت الكبارى والبحيرة ممكن تعمل العقدة على بعد متر والماكنة التانية تعملها العقدة على بعد 2 متر
كدة بقى عندك مكنتين بفلتين كل واحد فيها تعبان بيتحرك فى المية على عمقين مختلفين
طب ليه قلنا عمقين ما ظبطنهمش على عمق واحد او اشتغلنا بماكنة واحدة ؟
لان سمك اللوت سمك عايم بين الميتين ما بيقفش فى مكان واحد انت هنا بتعتمد ان حركة التعبان فى المية تستفز اللوت وهو معدى فيخطف الطعمة
دى الحكمة من استخدام مكنتين على عمقين مختلفين
اول ما الفلة تغطس منك سيبها خالص ولو سحب من شعر اديله لانه بيكون لسة ما بلعش التعبان كله بيبقى مسكه بسنانه وبيتزوقه اول ما تلاقيه شد جامد اشكم جامد ووقف ايدك بالماكينة وكون مهوى الفرامل بتاعة الماكنة شوية وتعامل معاه وربنا معاك لو مسكت فى (سجلباية ) فوق ال 5 كيلو

سمك اللوت

ملحوظة :  سمك اللوت وصيد السمك الكبير عموما عاوز تركيز يعنى ما ينفعش تقولى حتسلى جنبه ببوصة يد لغاية ما الفلة تنزل ممكن ياكل منك التعبان وانت مش حاسس وتلاقى نفسك ضيعت سمكة محترمة


اتمنى ان اكون افدتكم    ... وبالتوفيق إن شاء الله
طبعا لو غاوي صيد زيي لازم تزور صفحة تعلم صيد السمك واذا بتتعب من صيد التسقيط يبقي اكيد محتاج تعرف علاج دوار البحر

اتمنى للجميع الافادة وعشان تستفيد اكتر ادخل على 

https://al-sayad.blogspot.com

تابع معنا أيضا للمزيد من الخبره و المعلومات

طريقة صيد السمك بالعنب

  تحضير دود السبله لإستخدامه فى الصيد

 

طريقة صيد السمك بالبلح 

صيد البوري بالربع (المشنقة)